Gul teraa rang churaa laaye hain gulzaaron mein

Gul teraa rang churaa laaye hain gulzaaron mein
Jal rahaa hun bhari barasaat kii bauchhaaron mein

Mujh se kataraa ke nikal jaa magar ai jaan-e-hayaa
Dil kii lau dekh rahaa hun tere ruKhasaaron mein

Husn-e-begaanaa-e-ehasaas-e-jamaal achchhaa hai
Gunche khilate hain to bik jaate hain baazaaron mein

Zikr karate hain teraa mujh se baaunavaan-e-jafaa
Chaaraagar phuul piro laaye hai.n talvaaron mein

ZaKhm chhup sakate hain lekin mujhe fan kii saugaundh
Gam kii daulat bhii hai shaamil mere shaahakaaron mein

Mujh ko nafarat se nahiin pyaar se masluub karo
Main to shaamil hun mohabbat ke gunaahgaaron mein