pichli raat ke gehray sannatay main

pichli raat ke gehray sannatay main
wo apne haathon main apna sar liye
dair tak sochti rahi
ke raat ki chaabuk kab tak yunhi parti rahegi
tareeki ka naag kab tak seenay ke khazanay per qabza rakhega
wo sochti rahi
yahan tak ke ujalay
raat ki khirkiyoN per dastak dene lage
magar aagihi ki jugnoo ki aamad se
bus aik lamha qabal
subha ke mad-ham sitaray
neend ban ker uski aankhon main utar chukay thay