hamara dil savere ka sunahra jaam ho jaye

hamara dil savere ka sunahra jaam ho jaye
charaGhoN ki tarah aaNkheN jaleN jab shaam ho jaye

maiN Khud bhi ehtiyatan us gali se kam guzarta hooN
koi masoom kyoN mere liye badnaam ho jaye

ajab halaat the yooN dil ka sauda ho gaya aaKhir
mohabbat ki haveli jis tarah neelaam ho jaye

samandar ke safar meiN is tarah awaaz do hamko
hawayeN taiz hoN aur kashtiyoN meiN shaam ho jaye

mujhe maloom hai us ka Thikana phir kahaN hoga
parinda aasmaaN choone meiN jab nakaam ho jaye

ujaale apni yaadoN ke hamare saath rahne do
na jane kis gali meiN zindagi ki shaam ho jaye