Silsila Sa Janaab ! Banta Gaya

Silsila Sa Janaab ! Banta Gaya
Ik Haqeeqat Wo Khwaab Banta Gaya


Aks Paani Mein Dekhnay Ke Lye
Kaisay Chehra Gulaab Banta Gaya


Ham Ne Koi Sawaal Tak Na Kia
Wo Mukammal Jawaab Banta Gaya


Pehlay Unwaan Tha Wafa Ka Jo Shakhs
Baad Mein Wo Kitaab Banta Gaya


Neend Ka Tootna Bhee Apni Jaga
Khwaab Bhee Ek Azaab Banta Gaya


Dekhnay Mein Tha Ek Lafz Magar
Ishq Poora Nisaab Banta Gaya


Ham Haqeeqat Samajh Rahay Thay Jisay
Rafta Rafta Saraab Banta Gaya


Saaray Aalam Mein Ham Howay Tanha
Sab Ka Wo Intekhaab Banta Gaya


Pehlay Dil Torna Bura Tha Batool
Baad Mein Ye Sawaab Banta Gaya